Digitip – managers da pleds clav

Managers da pleds clav èn programs che salvan tut ils pleds clav sco en in tresor.

Arcunar tut ils access en in program è pussaivel cun in manager da pleds clav.
Legenda da maletgs: Arcunar tut ils access en in program è pussaivel cun in manager da pleds clav. Pixabay

Ozendi dovrins per mintga cumpra, empustaziun e conto en l'internet in utilisader ed in pled clav. Cun il temp san ins survegnir in caos cun tut quels logins. Per evitar da nizzegiar dapertut il medem u in sumegliant pled clav pon ins salvar tuts en il manager da pleds clav. In program ch'ins sa duvrar sin il telefonin, il computer u er il tablet per tegnair urden cun tut ils pleds clav. E cun intgins clics han ins access tar tut ils contos en l'internet senza stuair tegnair endament tut ils pleds clav correspundents.

In pled clav per in'entira massa pleds clav

Tut senza pled clav na van era ils managers da pleds clav betg. Era là dovri in per avair access. Uschia ston ins dentant be memorisar in sulet pled clav per avair access sin tut tschels. Tar managers da pleds clav datti in'entira massa purschidas. Talas ch'ins sto pajar ma er gratuitas. Tar las gratuitas tutgan tranter auter «Dashlane» u er «KeePass».

Agid per crear pleds clavs segirs

Plinavant porschan divers managers da pleds clav era ina funcziun che controllescha sch'in pled clav è segir u betg. Uschia pon ins cun agid dals managers era crear buns e segirs pleds clav per mintga access ch'ins dovra. En pli san ins er arcunar en il program autras infurmaziuns confidenzialas sco per exempel notizias persunalas u documents d'identitad.

Autur/a: Selina Chistell