Digitip – Folias per proteger il telefonin

Di per di, ura per ura, u anc pli savens duvrain nus noss telefonin. Cun quest diever datti era il privel che la part principala da l'apparat – il visur – vegn donnegià. Folias per il visur na protegian betg mo quel, ellas èn er ina furma da mantegnair la valur dal telefonin.

Las folias pon levamain vegnir plazzadas sin il visur dal telefonin.
Legenda da maletgs: Las folias pon levamain vegnir plazzadas sin il visur dal telefonin. RTR, Corina Luck

Differentas folias

Folias ultra cleras

Questas folias èn surtut ina protecziun per il visur e na duain betg midar las caracteristicas da tal. Tut guarda or tuttina, è dentant protegì meglier.

Folias da vaider

Questas folias han las medemas funcziuns sco la folia ultra clera. Ins na dastga qua dentant quasi betg pli discurrer d'ina folia – plitost d'in glas. Quel protegia anc meglier, è dentant er pli gross.


Folias nunreflectantas

Questas folias pon ins duvrar bain en cas da directa radiaziun dal sulegl. Ellas reduceschan enorm la reflecziun dal visur. Ina tala folia è pia ideal per activitads sut tschel avert. Dentant: Ellas pon midar las colurs dal visur, uschia che tut guarda or in pau auter che senza folia.

Tip

Diever 'normal'

  • folia satiglia tanscha
  • protecziun cunzunt da sgriffels

Diever frequent

  • Folia pli grossa (da vaider)
  • Protecziun betg mo da sgriffels, er da crudada dal telefonin

Applitgar folias è – simpel!

Ina chaussa dat en egl: Avant da tatgar si la folia avain nus tschertgà in guid – per gea far tut correct. Adumbatten. I na dat simplamain naginas indicaziuns.

Ins po pia vairamain dir: Mintgin po senza problems duvrar ina tala folia, e quai senz'instrucziuns.

Autur/a: Curdin Albin