Digitip – Decleraziun da taglia cun SofTax

Radund 6'000 persunas empleneschan anc adina lur decleraziun da taglia a maun. Adina daplirs fan diever da la pussaivladad da far quai a moda digitala. Cun il program SofTax, dal chantun. Ma tge avantatgs ha quai?

Emplenir la decleraziun da taglia cun SofTax spargna lavur.
Legenda da maletgs: Emplenir la decleraziun da taglia cun SofTax spargna lavur. Pixabay

Il grond avantatg è ch'il computer segirescha las datas. Vul dir ch'ins po gist surpigliar las datas da l'onn avant e mo actualisar quellas ch'èn sa midadas. Vul dir ch'ins po per exempel surpigliar las datas tar ils commembers da famiglia u da divers contos.

Plinavant quinta il computer ensemen tschertas cifras e surpiglia ils resultats automaticamain en las posiziuns correspundentas.


Er l'uffizi da taglia ha avantatgs

Er l'uffizi da taglia ha avantatgs sch'ins emplenescha la decleranza da taglia online. Numnadamain pon els spargnar la lavur da scannar ils documents. Quai dentant mo sch'ins trametta la decleranza da taglia er online. Sch'ins emplenescha ella mo online e trametta per posta, lura han els medem blera lavur.

Per il mument èsi però anc pli popular dad emplenir la decleranza da taglia online e trametter ella per posta. Uschia han il 2017 radund 75'000 emplenì lur decleranza vid il computer e tramess ella per posta e mo radund 24'000 han era dà giu ella online.

E sco fan ins quai igl meglier?

Avant che cumenzar cun emplenir la decleraziun duess ins rimnar tut ils documents necessaris. Uschiglio ston ins adina puspè interrumper la lavur per ir a la tschertga da quai e tschai.

  • Attest da paja, mussaments per pajaments da diarias or da l'assicuranza cunter dischoccupaziun, indemnisaziuns per la perdita da gudogn u pajaments da renta
  • Extracts da conto da la fin da l'onn
  • Vaglias
  • Quitanzas da la canorta d'uffants
  • Mussaments per custs da viadi u alimentaziun
  • Mussaments per custs da scolaziuns
  • Quitanzas da donaziuns
  • Mussaments da custs da malsogna pajads sez
  • Mussaments davart immobiglias mantegnidas, renovaziun u entradas da locaziun
  • Mussaments da paja en la terza pitga
  • Mussaments per debits
  • Decleraziun da taglia da l'onn avant
  • L'ultima imposiziun definitiva
  • evtl. Mussaments per pajaments da mantegniment

Emplenir decleraziun da taglia

Il meglier è da cumenzar cun ils formulars supplementars ch'ins sto inoltrar. Ils custs totals da quels pon ins lura supportar en la decleraziun da taglia. Suenter van ins tras quella pass per pass.

Tgi ch'emplaina la decleraziun electronica fa il meglier da suandar quella pass per pass e lura mintgamai emplenir ora ils formulars ch'ella dat en ad ins. Sch'ins na chapescha insatge betg, pon ins anc adina leger il mussavia.

Quà èsi impurtant da consultar la decleraziun da l'onn avant e cumparegliar. Lura vesan ins sche l'uffizi da taglia ha acceptà quai sco quai ch'ins ha fatg.

Inoltrar decleraziun da taglia

Per regla ston ins avair inoltrà la decleraziun da taglia cun tut ils documents necessaris a l'uffizi da taglia sin la fin mars. Sch'ins na vegn betg da far quai pon ins inoltrar tar il chantun ina dumonda per prolungar il termin fin settember. Il chantun na cusseglia dentant betg da far quai. Tgattar documents necessaris na vegn numnadamain betg pli simpel. Ina prolungaziun dal termin suenter il settember datti be en cas spezials.

Controllar la stimaziun è impurtant

Cura ch'ins ha inoltrà la decleranza n'è la lavur dentant anc betg finida dal tut. Cura che la stimaziun arriva, duess ins prender la peda da controllar quella. Tar tut la tecnica ed inoltrar online poi anc adina capitar sbagls. Per exempel duess ins controllar sche l'entrada suttamessa a la taglia e la facultad correspundan a quai ch'ins ha dà en.

Era controllar duess ins sch'il funcziunari ha resguardà la dretga tariffa da taglia. Per exempel per persunas singulas u maridadas, sche la confessiun constat e sche l'import da la taglia anticipada è correct. L'uffizi da taglia n'è numnadamain betg obligà da far attent sin differenzas.

Tge far sch'ins chatta in sbagl?

Sch'ins chatta lura in sbagl fan ins il meglier a dar in telefon e dumandar. Tut tenor èsi capità in sbagl sin l'uffizi che vegn curregì u che l'uffizi ha raschun ed jau hai per exempel propa betg il dretg da trair giu in curs da zambregiar sco furmaziun supplementara.

Sch'ins n'è suenter il telefon anc adina betg perina pon ins inoltrar a scrit ina reclamaziun cunter la stimaziun. Quai sto succeder entaifer in tschert termin, per ordinari 30 dis. È quai temp vargà è la stimaziun definitiva.

Autur/a: Onna Riedi Janett / Lea Livers