Digitip – Cuschinar cun app? Cler. Ma: Tgenina?

Millis apps datti che duain gidar cun ideas, recepts e glistas da cumpra. Apps ch'han per il pli entschiet sco rimnada da recepts ed èn creschidas ad applicaziuns pli sofisticadas. Nus avain dà in sguard.

Apps da cuschinar en il test: Chefkoch, Kochmeister, Swissmilk
Legenda da maletgs: Chefkoch, Kochmeister e Swissmilk en il test. RTR

Il standard è creschì ils ultims onns. Tut las plattafurmas ed apps han blers recepts, han la pussaivladad da tschaffar agens recepts, da valitar e commentar ils recepts. Quai sco preparaziun. Automaticamain pon ins laschar calcular las quantitads – tut tenor il dumber da persunas e survegn la finala ina glista da cumpra ch'ins po pigliar en butia cun il telefonin.
Era che las instrucziuns, co cuschinar, han plaz sin 1 pagina al tablet è ozendi standard.

Las differenzas datti tar la survesaivladad, il funcziunament simpel ed opziuns spezialas.

Chefkoch

+ Plattafurma cun 275'000 recepts
+ Apps per telefonin (iOS/Android)
+ Pussaivladad da far recepts «privat» (betg accessibel a tuts)
+ Dumagnà test da «capuns» e «maluns»
+ Opziun da deactivar la bloccada automatica d'apparats mobils

– Senza reclama en text e video custi CHF 3.- / onn
– Navigaziun tar la tschertga pudess esser pli simpla (main clics)

Kochmeister

+ Plattafurma cun 67'000 recepts
+ Apps per telefonin (iOS/Android)
+ Simpel e survesaivel da navigar (surtut mobile)
+ Dapli ideas cun recepts spezials e navigaziun fitg simpla (app)

– Senza reclama e per dapli che 5 recepts custi CHF 1.-
– Glistas da cumpra na sincroniseschan betg
– Dumogna mo «capuns», nagins «maluns»

Swissmilk

+ Fitg survesaivel e scrittira gronda
+ Bleras infurmaziuns davart nutriment sanadaivel
+ Pussaivladad da mussar il recept en gallaria da fotos
+ Dumagnà il test da «capuns» e «maluns»

– Plattafurma cun 5'000 recepts
– Reclama inevitabla
– Nagina app; Navigar è bain simpel, però dovri blers clics

Conclusiuns

  • Tgi che vul valitar e commentar recepts, e tut tenor far in cudesch da recepts privats e far urden en sia rimnada da recepts, sa decida plitost per Chefkoch. Era perquai ch'el porscha il meglier servetsch da preparar la glista da cumpra e sincronisar sin tut ils apparats.

  • Tgi che tschertga simplamain in recept e surtut inspiraziun, tge cuschinar sa decida plitost per Kochmeister. Cun la rubrica «special» datti adina propostas pli spezialas.

  • Tgi che tschertga in recept e sa gia, tge ch'el vul cuschinar, e vul savair dapli da nutriment sanadaivel e tenor stagiun, sa decida plitost per Swissmilk.

  • Tgi che sa, tge cuschinar e tschertga mo in recept per stampar u spert guardar, co far, sa decida plitost per ina tschertga dal recept via maschina da tschertgar en l'internet. Là chattal ils recepts da tut las 3 plattafurmas.

Tge pon ins uschiglio anc resguardar

1. Sa chapescha betg metter memia datiers il tablet, telefonin u notebook da platta chauda ed aua currenta ;-)

2. Activar «modus da sgular» per supprimer telefonats e messadis ch'ins sto tut tenor quittar cun mauns plain frina ed ovs.

3. Bun appetit!

Autur/a: RTR/uca