Digitip – Chattar la senda da viandar cun «SchweizMobil»

Cun la primavaira e la bell'aura entschaiva puspè la stagiun dad ir a spass e far ina ni l'autra tura da viandar pli gronda. Cartas da viandar da palpiri na dovri betg pli per quai. La dretga app sin in telefonin basta.

Viandants sin ina muntogna.
Legenda da maletgs: Ir a viandar cun la app «SchweizMobil». Keystone

Il Digitip preschenta la app «SchweizMobil». La versiun gratuita da questa app porscha ina gronda schelta da turas e spassegiadas e quai cun las cartas da Swisstopo – pia las cartas uffizialas da viandar da la Svizra ch'i dat er anc adina era sin palpiri. La versiun gratuita lubescha dentant mo il diever da las cartas online. Quai che presuma in abunament da datas.

Per 35 francs l'onn datti «SchweizMobil Plus». Cun quella versiun èsi pussibel da chargiar giu las cartas e duvrar ellas offline. Ultra da quai san ins planisar gia naven da casa atgnas rutas e designar las vias en las cartas. Las atgnas turas san ins lura era documentar cun fotografias e commentaris.

Autur/a: Onna Riedi