Digitip – Arcunar paginas d'internet sco pdf

Cun arcunar paginas d'internet sco pdf èsi pussibel da salvar infurmaziuns interessantas e duvrar ellas offline. Il Digitip declera co ins fa quai.

Dus logos da pdf sin fund blau.
Legenda da maletgs: Arcunar paginas d'internet sco pdf. Colourbox

Bunamain mintga browser d'internet porscha ina funcziun per arcunar paginas d'internet sco pdf. En il browser Chrome da Google per exempel smatg'ins simplamain las tastas ctrl+p exact sco per squitschar. En la fanestra che cumpara van ins sin «midar» e selecziunescha enstagl d'in squitschader la funcziun salvar sco pdf. Sco proxim ston ins mo anc decider, nua arcunar la pagina. Ed en la versiun dal Chrome sin il telefonin selecziunesch'ins en in emprim pass da parter la pagina e lura da squitschar. Enstagl d'in squitschader elegian ins silsuenter da salvar la pagina sco pdf.

Sch'ins vul arcunar paginas d'internet en il browser Firefox, lura ston ins l'emprima giada activar l'Add-on correspundent en il browser ed avrir quel da nov. Silsuenter chatt'ins la funcziun d'arcunar paginas d'internet sco pdf cun smatgar sin la tasta dretga da la mieur.

Arcunar paginas d'internet sco pdf è ina buna funcziun sch'ins scriva ina lavur durant ina scolaziun e sa referescha en quella sin funtaunas or da l'internet. Ins sa uschia adina verifitgar las funtaunas, era sche las infurmaziuns sin las paginas d'internet vegnan adina puspè midadas. Ma era sch'ins vul simplamain duvrar infurmaziuns or da l'internet offline, porscha la funcziun d'arcunar ellas sco pdf ina buna schliaziun.

Autur/a: Onna Riedi