Digitip – App Threema – per ina communicaziun segira

Quasi tuts communitgeschan via telefonin u tablet. Passa 900 milliuns persunas dovran per quai WhatsApp. L'ultim temp ha WhatsApp dà da discurrer pervì da la protecziun da datas. Blers tschertgan perquai alternativas. Ina è l'applicaziun svizra Threema che duai porscher ina communicaziun segira.

trais screenshots da l'app threema
Legenda da maletgs: L'app threema per communitgar segir RTR

Threema è extraordinari perquai che:

  • L'utilisaziun è anonima. Ins na sto betg inditgar ina adressa dad e-mail ed er betg il nummer da telefonin.
  • Threema na rimna naginas datas dals utilisader e na po uschia er betg dar vinavant quellas.
  • Il transfer da datas è codà. Datas privatas restan be sin il telefonin.
  • L'applicaziun porscha quasi las medemas funcziuns sco WhatsApp.

Tge è different tar Threema?

Cumpareglià cun autras applicaziuns n'è Threema betg collià cun in nummer da telefon. Tar l'emprim'utilisaziun obtegn mintga utilisader ina ID dad otg cifras che vegn creada casualmain. Perquai pon ins duvrar Threema cumplettamain anonim senza stuair inditgar datas privatas.

Per communitgar daltuttafatg segir cun in'autra persuna sur Threema, èsi da far ina foto da sia ID en furma d'in QR-Code. Lura è la colliaziun la pli segira pussaivla.

Autur/a: RTR/ggf