Domenic Janett

Il musicist Domenic Janett ha survegnì il Premi grischun da cultura. Tgi auter less ins bunamain dir, siond che Janett enritgescha la scena musicala dapi tschintg decennis e quai na betg be en il Grischun, dentant era sur ses cunfins ora.

La quarta ediziun da la seria da stad «Sas anc?» da RTR è perquai deditgada al musicant universal da Tschlin. Gia baud (en ils onns 70) aveva la Televisiun Rumantscha deditgà in purtret al saxofonist e clarinettist. Da quel temp studegiava Domenic Janett al conservatori a Turitg. La scola auta da musica aveva prendì si el, era sch’el saveva, da quella giada, gnanca leger notas. Parallel cun ses studi da la musica classica sunava el en differentas furmaziuns da musica populara e da jazz.

La segunda sequenza mussa il musicant sco commember principal da la chapella «Engadiner Ländlerfründa». Per finir demonstrescha el sin la clarinetta, en sia moda incumparabla, co ch’ins po sunar il medem toc en differentas manieras.

Contribuziuns

  • Trailer

RTR