«La tatta dil patet-fuà»

Als fastizs da l'uratta franzosa.

Ins di ch'ina persuna è morta pir cura che nagin na sa regorda betg pli dad ella. En quest senn viva la «tatta dil patet-fuà» era passa otganta onns suenter sia mort e quai en famiglias zunt differentas.

Igl è stà in destin che l'uratta franzosa è vegnida a Ruschein. Per ella in destin dolurus, ma uschia èn ses descendents là nua ch'els èn ussa. Giuven e vegl, biadias e sut-sut-biadias. E la sut-sut-biadia Alice Bertogg è ida als fastizs da l'uratta franzosa e ha chattà ina gronda famiglia.

Redacziun: Alice Bertogg

L'istorgia:

La primavaira 1889 èn Gion Placi Cadruvi, sia dunna Marie Thérèse Louise e lur dus uffants arrivads a Ruschein. Atgnamain na vulevan els betg pli turnar en la patria da Gion Placi. Quel era emigrads en il nord da la Frantscha a Boulogne-sur-Mer. Là ha el lavurà sco mazler en in hotel, e là ha el emprendì d'enconuscher Marie Thérèse Louise. Els èn maridads ed han gì trais uffants en Frantscha.

Il figl pign è morts cun be nov mains e suenter che Gion Placi Cadruvi è sa blessads grev en in brischament è la famiglia giuvna turnada, sin cussegl dal medi, en ils culms da la Surselva.

Per Marie Thérèse Louise èsi franc stà ina dira decisiun da badunar sco suletta figlia ses dachasa al port da l'Ozean Atlantic e da cumenzar ina nova vita en in vitg muntagnard, quasi milli kilometers davent da la patria. Marie Thérèse Louise ha gì da sa disar vid la mentalitad dals da Ruschein, ma oravant tut vid lur linguatg, ch'ella na chapiva betg. A Ruschein è la famiglia anc creschida per dus uffants. Gion Placi è dentant morts cun be 45 onns. Sia dunna, la franzosa, è restada a Ruschein.

Ed ella è era anc oz, passa 80 onns suenter sia mort, ina part impurtanta da la famiglia Cadruvi e ses descendents.

 

Contribuziuns

Autur/a: RTR/cl