Giovanni Segantini – ina nova amur per Savognin?

Dal tuttafatg emblidà n'è el mai stà a Savognin - Giovanni Segantini. E tuttina vegn l'artist da renum mundial mess en connex cun la Engiadin'Ota e betg cun il Surses. E quai malgrà che Segantini ha vivì e picturà durant otg onns a Savognin e be quatter en Engiadina. Midar duajan quai ussa las festivitads dals 17 e 18 da settember, ch'il Parc Ela organisescha a Savognin. È Segantini ina nova amur per Savognin? Ina schanza turistica? E pertge n'han ins betg nizzegià ella enfin ussa?

Dasper la festa per Segantini dat il Magazin da cultura er in sguard sin la nova stagiun dal Teater da Cuira. Nus schain, cun tge preschentaziuns ch'il teater vuless carmalar ses public e numnain ils puncts culminants e las ivettas da la stagiun 2016/17.

La rubrica litteratura è questa fin d'emna deditgada als uffants: Esther Krättli preschenta trais istorgias che raquintan da persunas extraordinarias e da chaussas incrediblas.

Redacziun: Rafael Müller

Contribuziuns

Autur/a: rtr/rem