Nossa emissiun è deditgada a chapellas che dovran instruments exotics e spezials per interpretar lur sauts. En la musica populara svizra sunan bleras furmaziuns cun instruments tradiziunals. En il Grischun savens cun 2 clarinettas, 2 orgelets e cuntrabass, en autras regiuns cun accordeons ed er clavazin. Durant ils tschientaners passads aveva la violina ina rolla impurtanta, uschia tar la musica dals Fränzlis ubain da la Husistein-Musik.
Mintgatant vegnan però er duvrads instruments nunusitads sco fagot, vibrafon, ghitarra, ukulela, orgla da baselgia e la citra. Perquai udis vus sauts cun las chapellas Husistein Musik, Münsiger Spiellüt, Hanneli-Musig e da la chapella Trio Räss.
