Willie Nelson: «Last Man Standing»

ilmusicist da country ha 85 onns
Legenda da maletgs: Keystone

En la musica da country americana datti las legendas sco Johnny Cash, Merle Haggard e Hank Williams e surtut er Willie Nelson. El ha festagià dacurt ses 85 avel.

In motiv per ir a la fin en pensiun? Na, al cuntrari! El ha gist publitgà ses 67 avel disc, cun il titel «Last Man Standing», l'ultim ch'è anc preschent. Quel disc cuntegna cumposiziuns che Nelson ha fatg cun ses producent Buddy Cannon. Er il toc ch'ha dà il titel al disc han els cumponì ensembel, però en ina moda in pau speciala, surtut per in veteran da la musica.

Cun messadis via la rait han els sa tramess texts e melodias ed uschia è naschida la chanzun. Willie Nelson è er in che fa jazz e che improvisescha, e perquai han els dovrà en il studio paucas registraziun fin che «Last man standing» è stà pront.

Autur/a: Jachen Prevost