Wham: «Last Christmas»

George Michael
Legenda da maletgs: MAD

Cur ch'ins va da quests dis en grondas butias e centers da cumpra datti adina puspè l'effect d'automatissem annual. Lura aud'ins «Last Christmas» da Wham, il duo cun George Michael ed Andrew Ridgely. Questa chanzun è cumparida ils 15 da december dal 1984, ina chanzun che ha anc uss blers amaturs e blers adversaris e che cumpara mintga onn puspè en las paradas da hits.

La chanzun n'è betg ina tipica da Nadal, ella raquinta d'ina relaziun durant quel temp. El aveva regalà ad ella ses cor, pero gia in di pli tard ha ella dà davent quel, ina gronda dischillusiun durant il pli bel temp da l'onn.

George Michael aveva gì l'idea, scrit il text e lavurà vi da quel l'entira notg, fin ch'el è sta cuntent. Vegn quai a dar in ulteriur success? Wham eran quella giada gia superstars e lur chanzuns «Wake Me Up Before You Go Go» e «Freedom» avevan ina preschientscha massiva en ils radios e las paradas. Il success è vegnì, er per «Last Christmas». E malgrà tut las discussiuns per e cunter: il ritual sa repeta mintg'onn e la chanzun va e va e va...

Autur/a: Jachen Prevost