Traveling Wilburys: «Handle with care»

Bob Dylan, Jeff Lynne,Tom Petty, Georeg Harrison e Roy Orbison
Legenda da maletgs: MAD

Santa Monica en California, l'onn 1988. En il giardin da Bob Dylan datti in inscunter spontan tranter amis e collegas. Sper il patrun chasa èn anc George Harrison, Jeff Lynne, Roy Orbison e Tom Petty da la partida. Els cumenzan a sviluppar ina chanzun e Harrison ha in'idea. En la garascha daspera vesa el ina stgatla da chartun in pau donnegiada, cun l'inscripziun «Handle with care», tractai cun precauziun!


Pauc pli tard han els las emprimas lingias dal text ed er in pèr tuns per la musica. Els fan in pèr pass fin tar il studio da Dylan e registreschan chant e ghitarras – e Jeff Lynne fa lura pli tard la lavur finala al pult da maschaida. Quel inscunter spontan è l'origin d'ina band, da la supergruppa «Traveling Wilburys» e sin lur emprim disc che cumpara l'october dal 1988 è «Handle with care» l'emprima chanzun ed er l'emprima single. Il success è stà remartgabel. I dat però er insatge trist. Per Roy Orbison è quai stà l'ultim toc ch'el ha registrà. El è mort be dus mais pli tard, ils 6 da december dal 1988.

Autur/a: Jachen Prevost