Temptations: «Papa was a rollin’ stone»

la band da soul ed r'n'b americana
Legenda da maletgs: Keystone

Norman Whitfield e Barrett Strong èn dus cumponists d'emprima classa. Per la chasa discografica da Motown a Detroit han els cumponì blers semperverds da soul ed r'n'b, per Marvin Gaye, Jimmy Ruffin, Gladys Knight e Martha Reeves. Ils pli gronds success han els pero cun la gruppa vocala «Temptations» la fin dals onns 60 e principi 70. Lur capoovra è «Papa was a rollin' stone», ina chanzun extrema en plirs reguards. L'original ha ina lunghezza da 12 minuts, la segunda versiun anc adina 7 minuts. L'emprim datti in intro pulsant che cumenza cun bass e batteria, lura vegnan ils tuns d'ina ghitarra captivanta, pli tard corns e trumbettas cun in funk e soul psicadelic. Lura, davo 2 minuts Dennis Edwards, il chantadur principal dals «Temptations», segui dals auters. Els raquintan d'in giuven che n'ha mai enconuschì a seis bap e che vul savair dapli da sia mamma. Ella disch: Quel era in «Rolling Stone», in crap cha na fa nagin mistgel, adina en gir e mai a chasa. La chanzun trista è daventada in grond success, malgrà sia lunghezza monumentala e blers auters han pruva da far lur versiuns. L'original dals «Temptations» è nuncuntanschì.

Autur/a: Jachen Prevost