Simple Minds: «Don't You (Forget About Me)»

cun ses chantadur Jim Kerr sin il palc
Legenda da maletgs: Reuters

Il producent brit Keith Forsey e Steve Schiff, ghitarrist da la band da Nina Hagen, avevan cumponì ina chanzun ed han lura dumandà a pliras bands sch'ellas lessan registrar quella. Els n'han però chattà nagins interessents: La band «The Fixx» ha ditg na. Er Bryan Ferry e Billy Idol n'han betg vesì il potenzial da la chanzun. A la fin ha Forsey contactà ils «Simple Minds», ina band da la Scozia cun talent, però enfin quella giada senza in hit. Er els han l'emprim refusà, lur firma discografica dentant ha animà els da prender la chanzun.

«Simple Minds» èn ids en il studio ed han registrà quella aifer 3 uras. Il 1985 è la chanzun cumparida sin il soundtrack dal film «The Breakfast Club» e dapi quella giada è «Don't You (Forget About Me)» in dals pli gronds imnis da rock dals onns 80.

Autur/a: Jachen Prevost