Queen: «Bohemian Rhapsody»

Freddie Mercury, chantadur da Queen
Legenda da maletgs: Freddie Mercury, chantadur da Queen Keystone

Oz avant 25 ons è mort in dals pli gronds musicists, chantadurs e cumponists da la musica da rock. Freddie Mercury ha bandunà il grond palc pervi da sia malatia da SIDA, ed il mund ha pers ina da las vuschs las pli marcantas, expressivas ed imposantas.

Ina da las chanzuns las pli impurtantas dal rock, il pli grond hit da sia band Queen e sia capoovra sco cumponist è «Bohemian Rhapsody», ina chanzun enorm cumplexa, la producziun la pli chara da quel temp. Mercury ha cumponì la chanzun pass per pass en differents segments e perquai datti sis parts : in intro a capella, cun in part da clavazin, suenter 49 secundas segua ina ballada, tar 2 minuts e 35 in solo da ghitarra da Brian May. Las proximas parts: ina classica, ina da rock dir ed in outro pli plaun cun chant, piano e ghitarra.

Durant las registraziuns vegniva numnada la chanzun «Freds Thing», pertge ils auters commembers da Queen han registra lur parts senza savair tge intenziuns che Mercury aveva. A la fin hai lura er dà in'ovra monumentala tenor ses gust. Ella è cumparida ils 21 da november dal 1975 sil disc «A Night at the Opera».

Queen: Bohemian Rhapsody

Autur/a: RTR/jp