Peter Tosh: «Johnny B. Goode»

musicist da reggae da Jamaica
Legenda da maletgs: Keystone

Avant 30 onns è mort in dals pli enconuschents musicists da reggae. Peter Tosh, commember dals Wailers, è vegni assaglì e mordrià en sia chasa a Kingston/Jamaica. Ina da sias pli interessantas chanzuns è ina reprisa e quella ha er in'istorgia in pau speziala.

Il 1983 registrescha Peter Tosh ses 6avel album sco solist, «Mama Africa». La gronda part dals tocs èn ses agens. In ha el pero surpiglià da Chuck Berry: «Johnny B. Goode» che ses ghitarrist Donald Kinsey aveva proponì. Els èn lura ids en ils
Dynamic Studios a Kingston, però cura che Tosh ha badà ch'el sto chantar «You got to be the leader of a rock and roll band» ha el refusà da far quai. Suenter lungas discussiuns cun ses manager han els chattà ina soluziun: «Rock'n roll» è vegnì remplazzà cun «Reggae» e «Louisiana» cun «Mandeville». Tosh, ch'aveva anc adina pauc gust, ha lura fatg a savair ch'el fetschia be ina versiun. Pero gia suenter paucas secundas ha el fatg in sbagl ed ha stuì cumenzar danovmain. A la fin ha el survegnì adina dapli plaschair ed ha chantà 12 giadas «Johnny B. Goode».

Autur/a: Jachen Prevost