Nina Simone: «Suzanne»

la chantadura da jazz americana
Legenda da maletgs: Keystone

Da las chanzuns dal chantautur e poet canadais Leonard Cohen datti nundumbraivlas reprisas, surtut da «Suzanne». Ina da las zunt specialas vegn da Nina Simone. Ella era chantadura da jazz, soul e blues ed ha fatg numerus discs durant sia carriera. Il 1969 ha ella registrà «Suzanne» durant in concert a Roma, ina versiun dal viv. Quella era cumparida dus onns avant sin il disc da debut dal chantautur canadais, in toc simpel, stgars e monoton, pero cun gronda tensiun e plain admiraziun.

Tar Nina Simone datti dus versiuns, ina da piano ed ina pli exotica cun ghitarra e percussiun, precis il cuntrari da Cohen. La chanzun daventa pli sperta e plain groove da jazz e Nina Simone dà tut in'autra vita a «Suzanne», sia vusch avra autras sferas e fa sigls inaspettads. Da la chanzun melancolica da Cohen fa ella in toc alleger e divertent.

Autur/a: Jachen Prevost