Neil Young: «Heart of gold»

il chantautur canadais
Legenda da maletgs: Keystone

Il canadais Neil Young ha 71 onns e durant sia lunga carriera sco musicist, cumponist ha el adina persequità ina lingia consequenta ed il motto «Rockin in the free World». En sia collecziun da 37 discs da studio e 59 singles datti pero in album ch'è different: «Harvest», ses quart disc da studio tuna cumplettamain auter – e gist quel ha gì il pli grond success.

Pervi da ses mal il dies aveva el quella giada gronda fadia. El na pudeva star per lung temp guliv si e la ghitarra electrica era memia greva. Uschia ha el fatg ina seria da chanzuns acusticas, en il stil da country folk, registradas il 1971 a Nashville. Per la gronda part dals tocs han Young e sia band duvrà be duas registraziuns, ed el n'aveva betg furnì bleras instrucziuns, però ils musicists da la band han sentì immediatamin co ch'i sto tunar: lev e simpel, folk acustic cun elements da country.

«Harvest» è lura daventà l'unic album nr. 1 per Neil Young.

Autur/a: Jachen Prevost