Marc Cohn: «Walking in Memphis»

chantadura american
Legenda da maletgs: Keystone

Il chantautur american Marc Cohn ha cumponì bleras bellas chanzuns. Però surtut ina è zunt impurtanta per el:

«Walking in Memphis» è ina chanzun autobiografica che raquinta d'in viadi a Memphis, la citad dal soul e blues en il stadi da Tennessee. E quai è er ina chanzun che ha midà sia vita, di Marc Cohn. Suenter quai viadi è el stà in auter.

El aveva 28 onns, steva a New York, lavurava sco cumponist, però sias chanzuns eran plitost mediocras, nagut spezial. E las perspectivas da far carriera pitschnas. In bel di legia el in'intervista da ses idol James Taylor e quel è persvadì, che far viadis saja ina buna via per survegnir inspiraziuns. Uschia va Cohn il 1986 a Memphis, chamina tras la citad, vesa e passenta bler. Cler, el va a Graceland e senta il spiert dad Elvis, el auda il gospel dal ravarenda Al Green e fa ina visita al Hollywood Cafe per vesair Muriel Davis Wilkins che suna clavazin e chanta sias chanzuns incrediblas.

Cun tut questas experientschas ed impressiuns turna el a New York e cumenza subit a cumponir. E propi, ses viadi a Memphis ha dà novas inspiraziuns ed energias e Cohn creescha ina chanzun fantastica, cun in intro da piano da bellezza. El raquinta cun bels purtrets da sias spassegiadas tras Memphis.

Autur/a: Jachen Prevost