Linard Bardill: «Il bös-ch rumantsch»

Linard Bardill
Legenda da maletgs: Linard Bardill Linard Bardill è dapi passa 30 onns da chasa sin tribuna. MAD

Linard Bardill ha 60 onns, è dapi 33 onns sin viadi sco chantautur, poet e scriptur. Damaun sa preschenta el en la «Klibühni» a Cuira cun ses program nov: «Sün viadi, Best Of 33», 39 chanzuns dals ultims 33 onns. Ina da las chanzuns impurtantas da Linard Bardill è «Il bös-ch rumantsch», ina ch'el ha fatg cun il text d'ina poesia da Madlaina Stuppan, tenor el in dals megliers texts dals ultims onns: simpel e cler che va profund.

Cun questa chanzun ha Linard Bardill creà in nov imni rumantsch. Tamangur, il guaud da schembers sin 2'200 meters entadim la Val S-charl, in guaud che fascinescha, e ch'è er simbol per la lingua e cultura rumantscha che ha da cumbatter per sia existenza.

«Il bös-ch rumantsch» è in dals emprims semperverds da Linard Bardill, però - e quai è ina surpraisa - el na cumpara betg sin il disc nov, pertge el ha stuì decider tranter duas chanzuns davart «Tamangur»: «Il bös-ch rumantsch» e quella cun il text da Peider Lansel. A la fin è el lura sa decidì per la segunda, perquai ch'el aveva l'impressiun ch'il «Il bös-ch rumantsch» en la versiun originala saja memia pauc «groovig». Perquai ha el er l'intenziun da far lura ina giada ina nova versiun.

Autur/a: Jachen Prevost