Kyu Sakamoto: «Sukiyaki»

Ses hit è: Sukiyaki
Legenda da maletgs: MAD

L'affar da musica da l'America dal nord vegn dominà da chanzuns da lingua englaisa. I po pero capitar ch'ina chanzun pli exotica ha success, sco tar Kyu Sakamoto, il Frank Sinatra dal Giapun. Il 1961 ha el in hit cun il toc «Ue o muite aruko», ina chanzun d'amur che daventa in hit. Via diversas staziuns riva ina versiun instrumentala er en ils Stadis Unids, ed in moderatur da radio la preschenta e svaglia l'interess.

Dus onns pli tard datti a la fin ina nova versiun per il public american ed european, cun il titel main cumplitgà «Sukiyaki» e quella riva sin l'emprima plazza da las paradas da blers pajais. Co che la chanzun ha survegni quest titel nov è in'autra istorgia. «Sukiyaki» è fantasia, pertge quai è il num d'ina spaisa giapunaisa. Quai fiss sco ch'i dess ina versiun giapunaisa da «In en dus» da las Liricas Analas e quel avess lura nom «Capuns».

Autur/a: Jachen Prevost