John Lennon: «(Just Like) Starting Over»

John Lennon, suenter la separaziun dals Beatles
Legenda da maletgs: Keystone

Ils 8 da december 1980 ha Mark David Chapman assassinà John Lennon davant il Dakota Building, il domicil dal musicist britannic a New York. Per tut ses fans e per blers auters ina gronda tragedia! Paucas emnas avant aveva Lennon lantschà ses return, suenter ina pausa pli lunga. Durant quest temp era el sa deditgà a la vita da famiglia e pir 5 onns pli tard aveva el puspè chatta il gust da far musica.

Ses disc nov «Double Fantasy» e l'emprima single «(Just Like) Starting Over» n'han però betg persvadì dal tut ils critichers ed il public ed en las paradas da hits è ella rampignada be plaunsieu vers las emprimas plazzas. Però suenter il murdraretsch è tut sa midà, ed ils 27 da december è ella rivada sin l'emprima plazza. Là è ella stada per 5 emnas ed è daventà il pli grond success solo da John Lennon en ils Stadis Unids.

Autur/a: Jachen Prevost