John Denver: «Country Roads»

John Denver
Legenda da maletgs: Keystone

«Country Roads» dal 1971 è la chanzun clav da Henry John Deutschendorf, alias John Denver, in chantautur da folk american enconuschent per sias chanzuns davart la natira e l'ambient e la vita en champagna. Naschì è el a Roswell, New Mexico, ed ha vivi blers onns en il stadi muntagnard da Colorado.

«Country Roads» dechanta in paesagi da bellezza en la regiun da las Appalachas en l'ost dals Stadis Unids. Là èn ils «Blue Ridge Mountains» ed il «Shenandoah River», pero Denver ed er ses co-auturs Bill Danoff e Taffy Nivert n'èn mai stads da quellas varts. Lur chanzun sentimentala è dimena vegnida cumponida cun blera fantasia ed ha tuttina tuc il gust d'audituras ed auditurs, surtut en la regiun da West Virginia.

Là hai dà reacziuns euforicas e la chanzun è dapi il 2014 er ina da las chanzuns uffizialas dal stadi. Quai malgrà il fatg che las attracziuns sco ils «Blue Ridge Mountains» èn be per pitschna part sin ses territori – e la via simpla d'ina giada è uss per part in highway cun 4 vials.

Autur/a: Jachen Prevost