Jimmy Ruffin: «What Becomes of the Brokenhearted»:

il chantadur da Motown
Legenda da maletgs: MAD

Alphonso Williams ha gudagnà dacurt l'emissiun da casting «DSDS» cun sia interpretaziun d'in vegl hit da Motown dals onns 60: «What Becomes of the Brokenhearted» da Jimmy Ruffin, in giuven che ha fatg ina carriera sco or d'in cudesch. Il figl d'in cuntadin en il stadi pover da Mississippi è daventà chantadur tar la firma discografica da r'n'b e soul Motown a Detroit, e là ha el pudì far carriera. Ses hits: «Hold on (to my love)» e surtut «What Becomes of the Brokenhearted», ina cumposiziun dal trio William Weatherspoon, Paul Riser e James Dean. Oriundamain avevan els scrit la chanzun per la band «The Spinners», ina da las bleras bands vocalas da Motown. Ruffin ha però pudì persvader ils responsabels da laschar chantar el questa chanzun trista e melancolica, ina chanzun davart in grond mal d'amur suenter che la marusa è partida. Ed el ha chantà cun passiun ed intensitad, sco sch'il cordoli fiss ses agen. Sco band ha el survegnì la band da chasa da Motown, ils «Funk Brothers», che han sunà tar blers hits e semperverds. Per Jimmy Ruffin è quai daventà ses pli grond hit en sia carriera. Dapli success ha gì ses frar pli giuven David, quel è daventa chantadur tar ils «Temptations».

Autur/a: Jachen Prevost