Deep Forest: «Sweet Lullaby»

e lur toc Sweet Lullaby
Legenda da maletgs: MAD

Ina chanzun da buna notg riva en las paradas da hits, ina chanzun tut speziala cun tuns fitg exotics, autra sco tut quai ch'ins udiva il principi dals onns 90: quai è «Sweet Lullaby» dal duo franzos Michel Sanchez ed Eric Mouquet. Els faschevan musica electronica, ambientala cun elements dal New Age e da la musica mundiala. Sin lur emprim disc «Deep Forest» dal 1992 han els fatg ina chanzun che cumbinava lur tuns moderns cun vuschs da pievels indigens da las forestas africanas e da l'America dal Sid. Blers crajan che «Sweet Lullaby» haja da far cun chanzuns che vegnan da l'Africa, pero en quest cas è quai ina chanzun da buna notg da las islas Salomonas en il Pacific. Il 1970 aveva l'ethnolog da musica svizzer Hugo Zemp registra in per chanzuns e Mouquet e Sanchez han dovra parts da quellas per lur «Sweet Lullaby». La chanzun è daventada in hit en Europa, ha pero er procurà per cuntroversas. Zemp scriva: Quai saja l'industria da musica globalisada che sa serva d'in patrimoni periclità per far divertiment e commerci, e quai senza dumandar il permiss e senza indichar danunder che singulas parts derivan, nempe dal chant da buna notg da las islas Salomonas.

Autur/a: Jachen Prevost