David Bowie: «Let’s Dance»

sin il palc
Legenda da maletgs: Keystone

David Bowie, naschì ils 8 da schaner 1947 a Londra e mort ils 10 da schaner 2016 a New York, ha fatg musica en tut las colurs, é stà cumponist, actur da film, icona da stil, ha inventà figuras fantasticas sco Ziggy Stardust ed il Thin White Duke – ed ha er vendì sur 140 milliuns albums.

Ses pli grond success ha el realisà cun ses disc il pli commercial e forsa er il pli pauc tipic, cumparì il 1983 suenter ina pausa da 3 onns. Entant che l'antecessur «Scary Monsters», è stà in disc cun rock d'art, ed elements da punk e new wave, eran «Lets dance» e surtut er la single cun il medem num tut in auter caliber, cun in sound actual, da pop e rock cun elements da disco e dance, ch'el aveva registrà cun in'equipa da studio d'emprima classa, cun Nile Rodgers sco producent, Bob Clearmountain sco inschigner da tun e sco ghitarrist aveva el engaschà a Stevie Ray Vaughan.

«Lets Dance» ha tuc il gust dal temp ed ha realisà ina vendita da sur 10 milliuns exemplars, ed è stà il disc cun il pli grond success commercial per David Bowie.

Autur/a: Jachen Prevost