Culture Club: «Do you really want to hurt me»

il chantadur dal Culture Club
Legenda da maletgs: Keystone

Ils 14 da gün/zercladur è naschì in dals musicists ils pli traglischants che ha mai dà en la Gronda Bretagna. George O'Dowd, chantadur, dj, fotograf e disegnader da moda. Ses num na di forsa bler, pero cun ses num d'artist Boy George è el fitg enconuschent. E cun sia band «Culture Club» ha el fatg furore ils onns 80. Già cun lur emprima chanzun han els realisà in hit mundial: «Do you really want to hurt me» è ina chanzun davart il mal d'amur che Boy George aveva, ina dumonda ch'el aveva fatg a ses partenari, quella giada batterist da la band, ed er ad auters da ses amis. Quells onns era la musica dals «New Romantics» populara en Gronda Bretagna, ed en quel stil ed anc cun in pau reggae ha quai da in hit surprendent, pero impurtant. Quai è stà lur ultima pussaivladad da survegnir in conctract tar ina firma discografica. Cun lur chanzun ch'è rivada sin plazza 1 en Gronda Bretagna, Frantscha, Germania, Svezia ed en Svizra – e nr. 2 en ils Stadis Unids han els mess la basa per lur carriera. Quella è pero stada da curta durada. Cun lur musica e lur vestgadira extravaganta èn els stads be per 2 onns en il center da l'interess.

Autur/a: Jachen Prevost