Y2

Uschia sa numna la nova arma cunter l'arsira da plantas. Perscrutaders da la Scola politecnica federala da Turitg han construì ina nova versiun da l'inimì natiral da la bacteria d'arsira da plantas.

perscrutaziun arsira da plantas
Legenda da maletgs: Perscrutaders da la Scola politecnica federala han chattà in nov med cunter l'arsira da plantas. Keystone

Y2 è in virus che vegn avant er en la natira sco inimì natiral da la bacteria d'arsira da plantas. Quel destruescha la bacteria, n'è però betg fitg effizient perquai ch'el na po betg bain tras la surfatscha glischna da la bacteria d'arsira.

Cumbinaziun da dus inimis natirals

Ils scienziads han cumbinà il virus Y2 cun in gen d'in segund inimì natiral da la bacteria d'arsira. Quel po bain atras la surfatscha glischna n'è dentant betg in bun destruider. Cun las abilitads dad omadus inimis natirals è la nova versiun dal virus Y2 in'arma fitg effizienta cunter l'arsira da plantas.

Bacterias che glischan

Ils perscrutaders han er anc stgaffì ina segunda versiun dal virus. Sche quella attatga las bacterias da l'arsira da plantas cumenzan quellas a glischar. Quest nov instrument per dir sch'ina planta è infectada u betg è tenor ils scienziads pli sperta ed er pli exacta che quellas ch'i dat fin uss.

Autur/a: Gion Gieri Flepp