Werner Kieser – il papa da fitness

Werner Kieser è in dals piuniers dal trenament cun maschinas. Il 1967 ha l'um da fatschenta svizzer fundà l'emprim studio da fitness, suandads èn passa 100 cun il sistem da franschisa en Svizra, Germania ed auters pajais.

Werner Kieser
Legenda da maletgs: Werner Kieser. KEYSTONE

Avant set onns parevi a fin cun ils studios da Kieser Training. Ils gestiunaris èn sa separads da Werner Kieser ed han cuntinuà cun il num Exersuisse. Werner Kieser ha sinaquai cumanzà tar nulla ed ha puspè avert singuls centers. A l'entschatta da l'onn ha el surdà quels ad in successur.

Ier han las gasettas Bund e Tagesanzeiger rapportà ch'ils studios Exersuisse van enavos tar Kieser Training. Uschia daventa il num Kieser puspè in num popular per il trenament en Svizra. En tut maina l'interpresa 155 studios en quatter pajais, ils blers en Germania.

Werner Kieser ha 77 onns. Durant decennis ha el propagà ensemen cun sia dunna Gabriela in trenament intensiv da la musculatura e da la forza per restar sauns e prevegnir a mals. Uschia è el daventà il papa e guru da fitness dals onns 1970 ed 80 en Svizra.

Autur/a: Marionna Lombriser