Walter Disney

Precis avant 50 onns è Walter Disney, il bab da Mickey Mouse, da Donald Duck, Goofy, Pluto e numerusas autras figuras da cartoon morts en la vegliadetgna da 65 onns. Walt Disney vala sco persunalitad pregnanta per il 20avel tschientaner.

Walt Disney cun ina figura da ses Mickey Mouse.
Legenda da maletgs: Walt Disney cun ina figura da ses Mickey Mouse. keyston

La figura dal Mickey Mouse n'è dentant betg dissegnada da Walt Disney sez, mabain da ses ami e pli tard art director Ubbe Iwerks. In onn decisiv en la carriera è stà il 1937, cur ch'il film d'animaziun 'Alvetta ed ils set nanins' è cumparì. Quai è stà l'emprim film da Disney da 90 minutas che ha er emplenì il programm da la saira. Auters classichers ch'èn suandads èn Pinocchio, Dumbo ubain er Bambi. Ils onns 50 è lura anc vegnì vitiers Cinderella, Peter Pan u Dornröschen.

Walt Disney è dentant betg be stà il 'Märchenonkel' da la naziun, mabain er in um da fatschenta versà, entgins din schizunt malizius. Per exempel ha el cumprà el zuppà e cun differentas firmas fictivas massa terren ad Orlando per pudair bajegiar ses Disney World. Avess el cumprà quel sco Walt Disney, fissan ils pretschs stads bler pli auts, perquai che ses Disney World ad Anaheim era gia in success.

Ultra da quai ha quai er dà renfatschas da antisemitissem cunter Disney e sia ovra. En insaquants da ses cartoons haja quai clischés problematics. Sco il schurnalist Neal Gabler scriva dentant en ses cudisch, saja Walt Disney sez betg stà antisemit, el saja dentant adina puspè stà ensemen cun antisemits.

Autur/a: Sabrina Bundi