Velos d’emprest

Adina pli savens ves'ins velos d'emprest en citads svizras. A Turitg datti danovamain firmas che porschan velos ch'ins sa prender a tschains flexiblamain cun il sistem da Free-Floating.

Ils velos da la firma O-Bike han procurà per gronda critica.
Legenda da maletgs: Ils velos da la firma O-Bike han procurà per gronda critica. Keystone

Ils velos han tuts la medema colur ed il medem stil. Uschia ch'ins enconuscha els sveltamain sin las vias en la citad da Turitg. Els circuleschan adina pli savens sin las vias u èn parcads en ils portavelos. La fatschenta O-Bike da Singapur è per exempel vegnida a Turitg cun 900 velos ch'ins po prender a tschains flexiblamain cun il sistem da Free-Floating.

Lieu d'emprest è flexibel

Il spezial è ch'ils velos na ston betg vegnì dà enavos en in tschert lieu. Ins sa metter els vid in portavelos uffizial en la vischinanza. Far diever da la purschida san ins cun in'applicaziun al telefonin. Suenter la registraziun han ins access sin la rait da velos. Per ch'ils velos vegnan er chattads han els in GPS che inditgescha il lieu. E sch'insatgi less emprestar in velo, sa el localisar in velo cun agid da l'app e dar liber quel. Per radund trais francs per ura pon ins lura duvrar el. Avant duvrar el l'emprima giada èsi anc da pajar in deposit da radund 130 francs.

Ils velos procuran per chaus cotschens

A Turitg han ils velos procurà per discussiuns. Els blocheschian ils portavelos e las vias. Er la citad è gia vegnida activa ed allontanescha velos ch'èn parcads fallì. I dat era concurrenza. Uschia han diversas fatschentas planisà da vegnir a Turitg u er d'expander lur purschida en autras citads svizras.

Autur/a: Selina Chistell