Timebelle

A Kiew en l'Ucraina ha la gruppa svizra Timebelle la schanza da sa qualifitgar questa saira per il grond final da l'ESC da proxima sonda.

Timebelle cun Miruna Manescu
Legenda da maletgs: Timebelle cun Miruna Manescu. KEYSTONE

A l'entschatta era la band Timebelle ina gruppa da tschintg giuvens che fascheva musica cun il num Balcan Import Ltd., damai che divers commembers da la boygroup han ragischs en l'Europa Orientala. I ha lura dà diversas midadas en la formaziun, tant tar ils commembers, tar il stil da musica sco er tar il num. Cunquai ch'ils giuvens avevan emprendì d'enconuscher l'in l'auter a la scola auta d'art a Berna, han els elegì il num Timebelle per regurdar a la tur Zytglogge, il monument istoric en la citad veglia da Berna. Avant trais onns è la chantadura rumena Miruna Manescu vegnida tar Timebelle. A l'ESC sa preschenta ella cun dus musicists da Timebelle, cun Emanuel Daniel Andriescu e Samuel Forster. La chanzun Apollo, cumponida da Nicolas ed Alessandra Günthardt, è deditgada al dieu grec dal chant.

Autur/a: Marionna Lombriser