Telstar

Ils 10 da fanadur 1962 è l'emprim satellit da communicaziun civil vegnì sajettà siador en l'orbit. Il Telstar ha revoluziunà la communicaziun tranter l'America e l'Europa.

Telstar
Legenda da maletgs: Telstar - l'emprim satellit da communicaziun privat tranter l'America e l'Europa. Keystone

Per l'emprima giada èsi stà pussaivel da transmetter tun e maletg tranter l'Europa e l'America. Be paucs mais suenter ch'il satellit era sin ses plaz è vegnì emess per l'emprima giada live in pled dal president american John F. Kennedy en la televisiun europeica.

In onn pli tard gia ord funcziun

Il satellit che ha custà 60 milliuns dollars n'ha dentant betg funcziunà ditg. In di avant ch'el è vegnì sajettà en l'orbit avevan ils Stadis Unids numnadamain testà ina bumba atomara er ordaifer l'atmosfera. Il Telstar è lura sgulà il di suenter tras il nivel da particlas da la bumba atomara e quai ha donnegià ferm el.

Il satellit ha en in'emprima fasa funcziunà be quatter mais. El è crudà or fin il schaner 1963 cura ch'igl è reussì da reactivar el. Gia il favrer 1963 ha el lura dà si il spiert dal tuttafatg.

Il num Telstar ha però survivì: L'ultim satellit che ha survegnì quest num è vegnì sajettà en l'orbit l'onn 2004, Telstar 18.

Autur/a: Gion Gieri Flepp