Sclerosa multipla

En Svizra èn passa 10'000 persunas pertutgadas da la malsogna e mintga di survegn in'ulteriura persuna la diagnosa MS. Oz, il di mundial da la sclerosa multipla vulan las organisaziuns far attent sin la malsogna e las fidas da viver cun quella.

sutga cun rodas
Legenda da maletgs: Savens munta sclerosa multipla er dad esser lià insacura vid la sutga cun rodas. Keystone

Tar la sclerosa multipla attatga il sistem d'immunitad l'atgna gnerva, las lingias dal tscharvè en las differentas parts dal corp. Uschia vegnan ils signals dal tscharvè als organs, musculs ed autras parts dal corp disturbads u schizunt interruts.

I vegn differenzià trais furmas da svilup da la malsogna:

  • andament cuntinuond (vegn mender e mender)
  • andament en stauschs (ina giada è la malsogna da sentir e lura puspè betg)
  • la varianta cumbinada da stauschs e pli tard lura vegni cuntinuadamain mender

Curar la sclerosa multipla n'è betg pussaivel. Cun medicaments, terapias ed er nutriment pon ins dentant franar u tegnair airi l'andament.

La malsogna sa mussa en differents sintoms. Quai pon p. ex. esser impediments en la bratscha u en las chommas, disturbis da la vesida, da sentiment e blers pertutgads èn er fitg stanchels.

Signal da set differents lieus en Svizra

Per far attent sin la malsogna e las sfidas dals pertutgads en il mintgadi ha la Societad svizra per sclerosa multipla organisà in event. Il di mundial da sclerosa multipla sa rimna glieud sin set plazs publics en Svizra. A Cuira sin la plazza Arcas.

Sin mintga plazza vegn furmà in bustab dal pled Signal. Quel vegn lura transmess a Turitg tar l'event principal e là vegn lura mess ensemen il pled Signal sin gronds moniturs. Signal perquai che la sclerosa multipla interrumpa ils signals dal tscharvè al corp.

Laschar ir video «Di mundial da sclerosa multipla»

Di mundial da sclerosa multipla

1:06 min, Actualitad video dals 31.5.2017

Autur/a: Gion Gieri Flepp