Sarah Höfflin

Ella tutgava tar las favuritas, e tuttina èsi ina sensaziun che Sarah Höfflin ha gudagnà oz la medaglia d'aur tar il freeski en la disciplina slopestyle. Höfflin ha numnadamain percorsch pir tard la passiun tar il freeski, suenter 8 onns senza ir cun skis.

L'olimpionica Sara Höfflin suenter l'aur en il slopestyle a PyeongChang 2018.
Legenda da maletgs: L'olimpionica Sara Höfflin suenter l'aur en il slopestyle a PyeongChang 2018. Keystone

Sarah Höfflin è la figlia d'in Genevrin, la mamma è da la Nova Zelanda. Sco matta è ella ida cun skis tut il temp ch'ella ha gì liber. Cun 12 onns laschan ses geniturs dentant sparter, Höfflin va cun la mamma en la Gronda Bretagna, cun ir cun skis èsi a fin. Pir cun 20 onns cumenza ella puspè ad ir cun skis, ella vegn scuvrida da trenaders svizzers e survegn in plaz en il team svizzer. Ina ruptura dal liom cruschà avess bunamain impedì la carriera da Höfflin che curuna sia carriera singulara cun ina medaglia d'aur tar ils gieus olimpics.

Autur/a: Angela Hendry