Rolling Stones e la Svizra

Ils concert dals Rolling Stones ils 12 da fanadur 1962, pia avant 55 onns, en il Club Marquee a Londra vala sco fundaziun da la band. Precis avant 50 onns han els concertà per l'emprima giada en Svizra.

Mick Jagger
Legenda da maletgs: Mick Jagger - il chantadur dals Rolling Stones durant in concert a Turitg l'onn 2014. Keystone

L'emprim concert en Svizra il 1967 en il Hallenstadion a Turitg è stà istoric en plirs reguards. D'ina vart èsi sta l'emprim concert en ina halla Svizra d'ina renumada band internaziunala, dal nov stil da musica da beat.

Cravals suenter concert

L'autra vart ch'è restada en memoria da l'emprim concert: ils cravals dals bun 13'000 fans. Ils Rolling Stones han terminà sco fixà en il contract il concert suenter 35 minutas. Quai n'ha dentant betg plaschì als fans ed els han rut massa sutgas da lain ed autra infrastructura.

Tut in auter temp

Per l'emprim concert aveva l'organisatur pajà en tut bun 10'000 dollars als Rolling Stones. Ozendi custan els passà 6 milliuns francs per concert.

Malgrà ils cravals ha il concert dal 1967 tuttina anc purtà in gudogn a l'organisatur Hans-Ruedi Jaggi – 150'000 francs.

Autur/a: Gion Gieri Flepp