Regal papal – maschinas da lavar resti

Papa Francestg ha laschà installar sis maschinas da lavar resti per persunas senza suttetg. Uschia less el far attents sin la paupradad en l'Italia.

Tar las sis maschinas da lavar resti s’audan era tumblers.
Legenda da maletgs: Tar las sis maschinas da lavar resti s’audan era tumblers. Keystone

Uss san persunas senza suttetg lavar lur resti en il Vatican gest sper la plazza da Son Peder. Sper quai servetsch aveva papa Francestg era gia drizzà en in container cun duschas per ils povers. Cun quest gest vul el far attent sin la paupradad en l'Italia. En il conturn dal Vatican passentian rodund 120 persunas regularmain las notgs. Quai sajan cunzunt persunas che han pers lur lavur e suttetg durant la crisa d'economia en l'Italia sco era fugitivs ed immigrants.