Prinziconsort Philip

Naschì è el sco prinzi da la Grezia e dal Danemarc. Dapi l'onn 1947 è el dentant cunzun enconuschent sco consort da la Queen Elisabeth la segunda. Uss, cun prest 96 onns, ha Philip decidì dad ir en pensiun. El sa retira il settember da tut las obligaziuns uffizialas.

Il princiconsort Philip sa retira cun prest 96 onns.
Legenda da maletgs: Il princiconsort Philip sa retira cun prest 96 onns. keystone

Quai na fa el betg ord motivs da sanadad. Cun il prinziconsort giaja bain. El lessia simplamain prender in zic pli patgific. Quai haja el gia vulì far l'onn 2011, dentant sajan anc stads termins impurtants en l'agenda royala – per exempel il giubileum da diamant da la queen l'onn 2012 ubain la pli lunga regenza dad ella il 2015.


Avant ch'el è maridà cun la Queen, ha Philip gì ina vita turbulenta. El è naschì a Korfu, la lètg dals geniturs haja dentant schon fatg naufragi tar sia naschientscha. Suenter in putsch è la famiglia ida en l'exil, dentant betg ensemen. La mamma ed ils uffants èn ids a Paris, il bab datiers da Monte Carlo. La mamma ha pli tard survegnì la diagnosa schizofrenia ed è ida en ina clinica. Da là davent ha Philip vivì tar differents parents, tranter auter en Germania.

Durant la segunda guerra mundiala ha Philip servì a la marina Brita. Quella giada ha cumenzà sia carriera militarica.

Enconuschent è il prinziconsort er pervia da ses humor sarcastic e nair. Per exempel ha el beneventà Helmut Kohl l'onn 1997 cun «Willkommen, Herr Reichskanzler».

Autur/a: RTR/ Sabrina Bundi