Pathfinder

La missiun cun la sonda Pathfinder è stada ina da las pli impurtantas en connex cun la perscrutaziun dal mars. La sonda è sa tschentada avant 20 onns sin il mars e saveva tranter auter trametter fotografias cleras da la cuntrada dal planet.

Il Pathfinder – ina sonda ed in roboter – l’onn 1997 sin il mars.
Legenda da maletgs: Il Pathfinder – ina sonda ed in roboter – l’onn 1997 sin il mars. Key

Il mars è il planet il pli preferì sch'i va per perscrutaziuns e studis. Enturn 50 missiuns dal mars hai gia dà. Dentant mo la mesadad da quellas èn la finala era sa tschentadas sin l'uschenumnà planet cotschen. Ina da las missiuns cun il pli grond success è quella dal Pathfinder ch'è sa tschentada avant 20 onns sin il mars.

Analisas exactas e fotografias

Il Pathfinder consisteva ord ina sonda ed in roboter. Quai roboter pudeva lura charrar cun agid da rodas per il planet enturn e far analisas dal terren, la crappa e la grippa sin il mars. Sper analisas exactas ha il Pathfinder er tramess millis fotografias da buna qualitad giu sin Terra. Quellas han interessads pudì contemplar sin ina pagina d'internet ed uschia per l'emprima giada pudì persequitar ina missiun cosmica mo cun intgins clics.

Rolla da pilot

La vita dal Pathfinder n'è betg stada lunga. Gia suenter quatter mais ha el tramess ils davos signals en direcziun Terra. Ma tuttina grazia a sias perscrutaziuns ha la NASA pudì emprender bler dal Pathfinder ed uschia sviluppar enavant las missiuns sin il mars.

Autur/a: Selina Chistell