Morignone

L'onn 1987 è stà in onn dad auas grondas, cunzut tranter Rabius e Tavanasa ed en il Puschlav ha quai dà donns. Dentant il mender ha quai tutgà la Valtellina. Oz avant 30 onns ha in'enorma bova destruì il vitg Morignone e chaschunà 53 unfrendas. 1'500 persunas avevan pers lur dachasa.

Il Pizzo Coppetto ozendi.
Legenda da maletgs: Il Pizzo Coppetto ozendi. wikipedia/it

Las 7:23 la damaun è sa sluccà sin il Pizzo Copetto sin 2'300 meters in pachet da 20 milliuns meters cubic crap ch'è sa sviluppà tar ina bova da passa 40 milliuns meters cubic. La massa è sballunada aifer da duas minutas a val. Il funs da la val è s'auzà per enfin 50 meters. L'aria che la bova ha tratg cun ha gì la fermezza d'in orcan ed uschia èn numerusas plantas da la spunda visavi cupitgadas ed in clutger baselgia è dà ensemen.

Per cumparegliar, la bova da Schlans dal 2002 è ida a val cun 60'000 meters cubic material, quella da la val Parghera sur Domat cun plirs tschientmilli meters cubic. 40 milliuns meters cubic, quai èn pia passa 650 giadas la bova da Schlans ubain quatter milliuns camiuns da trais axas cun ina mulda.

Autur/a: Sabrina Bundi