La nova funiculara sin il Stoos – in record mundial

Suenter tschintg onns da construcziun, dus onns pli tard che quintà, è la pli taissa funiculara dal mund vegnida inaugurada en il chantun da Sviz.

La nova funiculara sin il Stoos.
Legenda da maletgs: La nova funiculara sin il Stoos – la pli taissa dal mund. Keystone

En quatter minutas surmunta ella bunamain 750 meters d'autezza. Trais tunnels tras il grip mainan ella en las parts las pli taissas cun ina pendenza da fin 110% sin il Stoos.

La funiculara consista da dus chars lungs cun si quatter cabinas che porschan plaz a 136 persunas. Ina exclusivitad da la funiculara è er l'indirz idraulic che volva las cabinas uschia ch'ellas èn adina en l'orizotala era en ils pli taiss lieus.

Dapli custs e difficultads

Sco tar sumegliants projects datti er qua l'autra vart da la medaglia: I ha dà difficultads ed in accident durant las lavurs da construcziun sco er ina dispita pervi da daners.

Entras tut quai è la funiculara vegnida pli chara: budgetads eran 48 milliuns francs, l'ultima cifra era 52 millliuns francs. Ed anc il di da l'avertura n'èsi betg cler quant ch'il project custa definitivamain.

Autur/a: Gion Gieri Flepp