La mega-bumba americana

Quest'emna ha l'armada americana duvrà la uschenumnada mega-bumba en il cumbat encunter la milissa da terror Stadi Islam.

Per l’emprima giada ha l’armada americana fatg diever da la bumba dal tip GBU-43/B en l’Afghanistan.
Legenda da maletgs: Per l’emprima giada ha l’armada americana fatg diever da la bumba dal tip GBU-43/B en l’Afghanistan. Keystone

La bumba americana dal tip GBU-43/B vala sco bumba la pli ferma suenter las armas atomaras. La bumba è d'ina vart ina mega-bumba pervia da sia massa. L'arma è 9 meters lunga, ha in diameter da 103 centimeters e cuntegn 8'500 kilos material explosiv. Per bittar giu ella vegn duvrà in aviun da vitgira spezial.

L'arma è vegnida sviluppada durant la guerra en l'Irac

L'armada americana ha sviluppà la mega-bumba durant la guerra en l'Irac. Quai pervia ch'els levan in'arma ch'è effectiva per cumbatter grondas truppas. Duvrà han ils americans dentant mai la bumba. Pir quest'emna ha il president american Donald Trump fatg diever dad ella e quai en l'Afghanistan.

Autur/a: Selina Chistell