La China cumpra il mund

La ChemChina porscha al concern d'agrochemia svizzer Syngenta 44 milliardas francs per la cumpra.

Edifizi da ChemChina
Legenda da maletgs: ChemChina che less cumprar Syngenta. KEYSTONE

Avant curt aveva Syngenta anc ditg na ad ina vendita. Il concern american e grond concurrent Monsanto aveva mussà senza success interess. Ussa han ils respunsabels dentant dà suenter e fissan pronts per il deal cun il concern da stadi ChemChina. Ussa è anc da spetgar sch'il stadi american ha insatge encunter la vendita als Chinais u betg. Quai pervi che Syngenta è responsabel per in quart da l'agrochemia en ils Stadis Unids. Sche la China daventass il nov patrun da Syngenta pudess quai procurar per conflicts. La China fiss responsabla per ina part da l'agricultura americana ed uschia era per ina part da la segirtad interna.

Syngenta è dasper il concurrent Monsanto il grond concern d'agricultura mundial. Els fan tranter auter mutaziun da gen ed engrasch.
- 28'000 collavuraturs
- Svieuta da 13.4 milliardas il 2015
- Activ en 90 pajais


ChemChina è il pli grond concern dal stadi hhinais. Els èn responsabels per chemia, nutriment ed industria.
- 140'000 collavuraturs
- Svieuta da 45 milliardas il 2015
- Activ en 150 pajais

Concerns chinais cumpran per il stadi
ChemChina tutga al stadi. Els han la finamira da pudair far independent la China dad auters pajais. Quai declera era l'interess vi da Syngenta. En China viva numnadamain 20% da la populaziun mundiala. Il pajais posseda dentant mo 5% dal terrain agricul mundial. Perquai ha il pajais da producir effectiv per pudair sa nutrir sez. Il savair da Syngenta po qua gidar.


China sin tura da cumprar en il vest
Syngenta n'è betg il sulet concern che vegn cumprà da ChemChina. Era il producent da pneus Pirelli u la manifactura da plastic Kraus Maffai èn en ils ultims mais vegnì cumprads da ChemChina. Era auters concerns chinais èn sin tura da cumpra en il vest. Uschia è per exempel era vegnì cumprà la firma d'autos Volvo u numerus concerns d'ieli.


Il vest ha pauc plaschair da la situaziun
Ils pajais dal vest persequiteschan actualmain l'entira situaziun cun pauc plaschair. Cunquai che ChemChina ed auters concerns chinais tutgan al stadi n'èsi era betg difficil per els da survegnir credits dal stadi. Uschè èsi per ChemChina pli simpel da pudair far da quels gronds deals sco tar Syngenta. Quai n'è betg ina concurrenza faira. Dentant na san ins betg anc far bler encunter questa situaziun.


La China vuless cumprar tut il savair
La finamira da la China è clara. Els vulessan cumprar uschè blera savida sco pussibel. Uschia pon els lavurar si las deblezzas dal pajais tar la tecnica ed il management. Quai fa la China era transparent. Il vest ha ussa simplamain tema che l'entir savair da las firmas mundialas pudess ir a China.

Autur/a: RTR/dh