La chaplutta da Sogn Benedetg

L'architect grischun Peter Zumthor che festivescha oz ses 75avel anniversari, ha stgaffì il 1988 in giuvel cun la chaplutta en lain sur il vitg da Sogn Benedetg en la vischnanca da Sumvitg.

La chaplutta da Peter Zumthor sur il vitg da Sogn Benedetg
Legenda da maletgs: La chaplutta da Peter Zumthor sur il vitg da Sogn Benedetg. KEYSTONE

La chaplutta da Sogn Benedetg ha la furma d'in oval ed a l'exteriur sumeglia ella ad ina tur. La paraid è cuverta cun schlondas ch'èn daventadas brin stgiras u nairas en il decurs dals onns. Uschia sa fa ella cun las chasas veglias ed ils clavads brischads dal sulegl en il vitg da Sogn Benedetg. Ina sdrima da fanestras gest sut il tetg da la chaplutta sa tira enturn l'entir edifizi e lascha entrar ina glisch magica en l'intern dal bajetg sacral. Endadens dattan las pitgas da lain e las travs dal tetg l'impressiun dad esser en ina bartga e stgaffeschan in'atmosfera unica da ruaus e protecziun. Enstagl d'in clutger porta ina construcziun filigrana sper la chaplutta ils dus zains.
La chaplutta da Sogn Benedetg attira blers visitaders, amaturs da l'architectura da Peter Zumthor ed era persunas che tschertgan in lieu da paus e contemplaziun.

Autur/a: Marionna Lombriser