Jerry Lewis

El è stà in dals gronds divertiders suenter il temp da guerra. Ed ha cunzunt ensemen cun ses partenari Dean Martin fascinà e divertì in grond public. Cun 91 onns è Jerry Lewis mort.

Jerry Lewis aveva diabetes sco era ina malsogna dal lom.
Legenda da maletgs: Jerry Lewis aveva diabetes sco era ina malsogna dal lom. Keystone

En ses giuvens onns è l'American Jerry Lewis sa preschentà sco artist da grimassas e pantomimas. Quai dentant cun pauc success enfin ch'el ha inscuntrà l'artist Dean Martin. Ensemen cun el han els furmà ils onns quaranta e tschuncanta in duo da divertiment che ha procurà per gronds success er sur ils cunfins americans.

Pli pauc success sco solo

Pervia da divergenzas d'opiniun e squitsch da producziun è il duo dentant ì dapart suenter diesch onns. Cun quai n'è la carriera da Lewis dentant betg stada a fin. El ha lavurà sco reschissur e producent da film. El ha er vinavant fatg films da cumedia, dentant n'han quels mai pli giu uschè in grond success sco cun Dean Martin. Tuttina è Lewis stà sin tribuna ed ha giugà rollas scurrilas e quai enfin curt avant sia mort. Ils 20 d'avust 2017 è in dals pli gronds divertiders da Hollywood mort a Las Vegas en il ravugl da sia famiglia cun 91 onns.

Autur/a: Selina Chistell