Il pitschen prinzi ha 75 onns

Ils 6 d'avrigl 1943 cumpara il cudesch d'Antoine de Saint-Exupéry. Il pitschen prinzi è daventà ina capodovra da la litteratura mundiala.

Il pitschen prinzi - dissegn d'Antoine de Saint-Exupéry
Legenda da maletgs: Il pitschen prinzi - dissegn d'Antoine de Saint-Exupéry. KEYSTONE

«Ins vesa bain mo cun il cor, l'essenzial na ves'ins betg cun ils egls»

Quai è in dals citats ils pli renumnads or dal cudesch dal pitschen prinzi. Igl è in'istorgia da l'amicizia, da la bainvulientscha, dal respect e da la responsabladad per tut las creatiras. L'autur Saint-Exupéry dovra pleds simpels e modests per las pli impurtantas valurs da la vita. Il cudesch d'uffants è er in filosofic per creschids.

Cun blera simbolica raquinta l'autur dal pitschen prinzi e ses inscunters, da l'umet che vegn sin terra ed entaupa in pilot atterà per forza en la Sahara. Er las illustraziuns finas, reducidas a l'essenzial èn da l'autur e pilot Saint-Exupéry.

Dal pitschen prinzi datti translaziuns en passa 180 linguatgs, er en rumantsch. RTR ha edì il 2014 in disc cumpact cun l'istorgia sco gieu auditiv.

Autur/a: Marionna Lombriser