Hubert de Givenchy ha oz 90 onns

Il creatur e designer franzos Hubert de Givenchy ha influenzà sur decennis il mund da la moda. Uss cun 90 onns vul el far urden cun ses possess ed er ingiantar 22 ovras d'art dals frars Giacometti.

Hubert de Givenchy
Legenda da maletgs: Hubert de Givenchy. KEYSTONE

Ses concern da moda e cosmetica ha Hubert de Givenchy fundà il 1952 a Paris. Il 1988 ha el vendì l'interpresa a LVMH. Givenchy ha vestgì dunnas famusas sco Marlene Dietrich, Elizabeth Taylor u Jackie Kennedy. L'actura americana Audrey Hepburn è stada sia musa e cun ella ha Givenchy er propagà «il pitschen nair», il vestgì elegant fin schanugl. Il creatur da moda è er stà in collecziunader d'art. Da ses anteriur ami Diego Giacometti posseda Givenchy ovras d'art e da design ed ina sculptura d'Alberto Giacometti. Quels 22 objects vegnan ingiantads il mars a Paris.

Autur/a: Marionna Lombriser