Emmanuel Macron

El è tenor las ultimas retschertgas il favurit per la successiun da François Hollande sco president da la Frantscha. Ma tgi è l'um davos il moviment «En Marche»?

Emmanuel Macron
Legenda da maletgs: Il favurit per il presidi franzos, Emmanuel Macron, durant in pled avant aderents. Keystone

Emmanuel Macron ha 48 onns e deriva d'Amiens en il nord da la Frantscha. Bab e mamma èn medis. Gia baud ha Emmanuel Macron mussà talents da linguatg e musica. El ha gudagnà divers premis.

Macron ha frequentà in gimnasi d'elita, studegià filosofia e frequentà la scola naziunala d'administraziun. Suenter ha el lavurà per il ministeri da finanzas e sco investmentbanker. Emmanuel Macron è maridà cun Brigitte Macron ch'è 24 onns pli veglia ch'el.

Fitgà pe en la politica sut François Hollande

François Hollande ha engaschà Macron il 2012 sco cussegliader en dumondas da politica d'economia e da finanzas. Il 2014 ha il president lura nominà el sco minister d'economia, industria ed affars digitals. Là ha el tranter auter lavurà vid vastas refurmas per promover l'economia. Suenter la via tras il parlament èn questas refurmas dentant dispitaivlas da dretg fin sanester.

Emmanuel Macron represchenta interess socials ma er liberal-economics. Sco president vuless el reducir il dumber da parlamentaris, unir pli fitg las forzas tranter dretg e sanester e meglierar la relaziun cun la Germania.

Autur/a: Gion Gieri Flepp